मुख्यमन्त्री शाहीले आज विश्वासको मत लिदै, एमाले बिनै संसद चल्ने

सुर्खेत ।
मुख्यमन्त्री नियूक्त भएको २८ औं दिनमा कणर्ाली प्रदेशका मुख्यमन्त्री जीवनबहादुर शाहीले आज मंगलबार विश्वासको मत लिने भएका छन् । जसका लागि दिउँसो १ बजे संसद बैठक आह्वान गरिएको छ । मुख्यमन्त्री नियूक्त भएको ३० दिनभित्र विश्वासको मत लिनुपर्ने संवैधानिक व्यवस्था छ ।

आलोपालोमा सक्ता सञ्चालनको सहमति अनुरुप कार्तिक १६ गते पूर्वमुख्यमन्त्री महेन्द्रबहादुर शाहीले पदबाट राजिनामा दिएपछि काँग्रेस संसदीय दलका नेता शाहीे मुख्यमन्त्रीमा नियुक्त भएका थिए ।

मुख्यमन्त्री नियुक्र भएको २८ औं दिनसम्म शाहिले एक मन्त्री नियूक्त गर्नु बाहेक अन्य मन्त्रालय विस्तार गर्न सकेका छैनन् । विश्वासको मत लिए पश्चातमात्र मन्त्रिपरिषद विस्तार गर्ने रणनीतिमा मुख्यमन्त्री रहेको मुख्यमन्त्रीको स्रोत बताउँछ ।

मुख्यमन्त्री शाहीले विश्वासको मत लिन लागेपनि प्रमुख प्रतिपक्ष दल नेकपा एमाले भने बैठकमा नजाने भएको छ । एमालेको जारी १० औं महाधिवेशनका कारण आफूहरु सहभागी हुन नसक्ने एमाले संसदीय दलका नेता यामलाल कँडेलले जानकारी दिए । उनले भने, ‘उहाँहरुले अधिबेशन आव्हान गर्ने बेला नै थाहा पाउनु पर्थ्यो । उहाँहरुको भन्दा धेरै पहिले हाम्रो महाधिवेशनको मिति तोकिएको उहाँहरुले जान्नुपर्थ्यो ।’

एमाले संसदीय दलका नेता यामलाल कँडेलले भने, ‘ उहाँहरु प्रमुख प्रतिपक्षी दल बिना कसरी सदन संचालन गर्नु हुन्छ ? त्यो थाहा छैन तर हामी पार्टीको महाधिवेशनमा व्यस्त भएकाले सदनमा उपस्थिति हुन सक्दैनौं ।’

उनले अधिवेशन सत्ता पक्षले बिना परामर्श र एमाले महाधिवेशनलाई अटेर गरि आव्हान गरेको बताए । बैठकमा एमाले अनुपस्थित भए पनि संसद बैठक भने चल्नेछ । मुख्यमन्त्रीले विश्वासको मत नलिदा संवैधानिक जटिलता आउने भन्दै बैठक चल्ने सभामुख राजबहादुर शाहीले बताए ।