खानेपानी मुहानमा अत्याधिक बाढी आउँदा वीरेन्द्रनगरमा खानेपानी आपुर्ति बन्द

सुर्खेत ।
कर्णालीको राजधानी वीरेन्द्रनगरमा खानेपानी वितरण गर्दै आएको सुर्खेत उपत्यका खानेपानी उपभोक्ता संस्थाले खानेपानीका सबै मुहानहरुमा अतयाधिका बाढी आएका कारण खानेपानी आपुर्ति बन्द भएको जनाएको छ ।

संस्थाका प्राविधक शाखा प्रमुख इन्जिनियर बालाराम तिवारीले गएराती १२ बजेबाट खानेपानी आपुर्ति बन्द भएको जानकारी दिएका हुन ।

यसअघि पनि झुप्रा खोलाबाट ल्याएको पाइपलानमाथि पहिरो खस्दा झण्डै दश लाख भन्दा बढिको क्षति हुँदा सुर्खेतमा केहि दिन पानी वितरणमा समस्या आएको थियो । उक्त समस्या समाधान हुने वित्तिकै फेरि मुहानमा आएको ठूलो बाढीले खानेपानी आपुर्तिमा व्यवधान खडा गरेको हो ।

इन्जिनियर तिवारीका अनुसार केहि दिनदेखि भइरहेको अविरल बर्षाका कारण सुर्खेत उपत्यका खानेपानी उपभोक्ता संस्थाले उपत्यकामा खानेपानी वितरणका लागि प्रयोगमा ल्याएका खानेपानीका स्रोतहरु झुप्रा खोला, खरिखोला बोरिखोला, इत्रामखोला र खोर्के खोला मुहानमा अत्याधिक बाढी आएका कारण असोज २० गते राती १२ः०० बजेबाट खानेपानी सेवा अवरुद्ध भएको हो ।

उनले पहिलोप्रेससँग भने, ‘स्रोतहरुमा बाढीको बहाव कमहुने वित्तकै मुख्य प्रसारण पाइपलाइनमा र धमिलोपना कम हुने बित्तिकै प्रसोधन केन्द्रहरुमा पानी राखि खानेपानी संचालन गर्ने गरि कर्मचारीहरु खटाइएका छौं ।’