एमालेले कहिले टुंग्याउला दलको नेता ? आजसम्म भएन सांसदको भेला

सुर्खेत ।
नेपाली काँगेस कर्णाली प्रदेशले दलको नेता टुंगो लगाइसक्दा प्रदेश सभामा तेस्रो दलको हैसियतमा रहेको एमालेले हालसम्म दलको नेता चयन गर्न सकेको छैन । पुस ११ गते प्रदेश सभा सांसदहरुको सपथग्रहण कार्यक्रम तोकिसकिएको छ । हालसम्म एमाले संसदीय दल भित्र दलको नेता को बन्ने भन्ने विषयमा कुनैपनि छलफल भने हुन सकेको छैन ।

‘दलको नेतामा दुई जनाको दाबी छ । प्रदेश इन्चार्ज यामलाल कंडेल र प्रदेश अध्यक्ष विनोद कुमार शाहले दाबी गरिरहेका छन् ।’ एमालेका सांसद गोमता विकले भनिन्, ‘हाम्रो बसाई भएको छैन । दुइ जना मध्ये एक जना दलको नेता बन्नु हुन्छ होला नि… ।’

एमाले कर्णाली प्रदेश सभामा दश सिटमा खुम्चिएको छ । दलका नेता बन्न दुइ नेताको तीव्र चाहना भएपनि केन्द्रबाट अध्यक्ष केपि शर्मा ओलीले जसलाई बनाउन निर्देशन दिन्छन उहि दलको नेता हुने एमाले सांसदहरुको भनाई छ ।