मध्यपश्चिम विश्वविद्यालयको स्कुल अफ ल का निर्देशक विकको कार्यकक्ष तोडफोड, गरियो अभद्र व्यवहार

सुर्खेत ।
मध्यपश्चिम विश्वविद्यालय अन्र्तगतको स्कुल अफ ल का निर्देशक उपेन्द्र बहादुर विकमाथि अभद्र व्यवहार हुुनुका साथै कार्यकक्षमा समेत तोडफोड गरिएको भन्दै नेपाल राष्ट्रिय प्राध्यापक संगठन मध्यपश्चिम विश्वविद्यालय समितिले आपत्ती जनाएको छ ।

समितिका अध्यक्ष सिंहराज गुरुङद्धारा आज जारी गरिएको विज्ञप्तीमा त्यस्तो गर्ने अराजक विद्यार्थीलाई कारवाही गर्न माग समेत गरिएको छ ।

‘मिति २०७९ साल माघ २४ गते मध्यपश्चिम विश्वविद्यालय स्कुल अफ ल मा आन्तरिक मूल्याङ्कनको सम्बन्धमा केही अराजक विद्यार्थीहरूको हुल जत्थाले स्कुल अफ ल का कार्यक्रम निर्देशक उपेन्द्र विकको कार्यकक्षका साथै प्रशासन अधिकृतको कार्यकक्षमा तोडफोड गर्नुका साथै अभद्र व्यवहार गरी भौतिक दबाब दिई स्कूल अफ ल को लेटर प्याड दुरुपयोग गरी तयार गरिएको राजिनामा पत्रमा जबरजस्ती सही गर्न लगाइएकोमा यस नेपाल राष्ट्रिय प्राध्यापक संगठन म.प. विश्वविद्यालय समितिको गम्भीर ध्यानाकर्षण भएको छ ।’

विज्ञप्तीमा भनिएको छ, ‘उक्त घटनाको छानविन गर्न गठित छानविन समितिले अराजक तत्वहरूको प्रभावमा नपरी सत्यतथ्य प्रतिवेदन सार्वजनिक गर्न जोडदार माग गर्दछौं साथै विश्वविद्यालय जस्तो प्राज्ञिक थलोमा पदाधिकारी, प्राध्यापक तथा कर्मचारीहरुलाई भयरहित तवरले कार्य सम्पादन गर्न सकिने वातावरण सिर्जना गर्नुका साथै अराजक विद्यार्थीहरूलाई अनुशासनको कारवाही गर्न विश्वविद्यालय पदाधिकारी समक्ष जोडदार माग गर्दछौं ।’