मुख्यमन्त्री कार्यालयका कर्मचारीले पहिलो दिनमै नयाँ मुख्यमन्त्रीलाई दश मिनेट कुराएपछि…

सुर्खेत ।
कर्णाली प्रदेश सरकारका नवनियुक्त मुख्यमन्त्री राजकुमार शर्मा, विना विभागिय मन्त्री विनोद कुमार शाह र मंगल शाही प्रदेश प्रमुख तिलक परियारबाट सपथ ग्रहण गरेर मुख्यमन्त्री कार्यालयमा पुगे ।

कार्यालयका प्रमुख सचिवलगायतका कर्मचारीहरुले उनलाई भव्यताका साथ स्वागत गरे । फुलमाला लगाए ।

त्यसलगत्तै मुख्यमन्त्री पिएसओ, मन्त्री तथा पत्रकारसहित कार्यकक्षमा पुगे । उनि कार्यकक्षमा पुगेको झण्डै दश मिनेट पछि मात्रै प्रमुख सचिव डा. गोपीकृष्ण खनाल लगातका कर्मचारीहरु कार्यकक्षमा फाइल बोकेर आइपुगे ।

त्यतिन्जेलसम्म मुख्यमन्त्री तथा मन्त्रीहरु उभिइरहे । किनकी पदभार ग्रहण नगर्दासम्म मुख्यमन्त्री शर्माले कुर्सिमा बस्ने कुरा भएन । त्यहाँ उपस्थिक पत्रकारहरु आपसमा कानेखुशी समेत गर्न थाले ।

पूर्व मुख्यमन्त्री महेन्द्रबहादुर शाहीका प्रेस सल्लाहकार ध्रुव वुढाथोकी प्रमुख सचिवको खोज खबरी गर्न थाले । उता पत्रकार भने पहिलो दिनमै ढिलासुस्ती गरिनु राम्रो नभएको भन्दै प्रतिक्रिया जनाइरहे ।

पदभार ग्रहण गर्न ढिाई भएपछि मुख्यमन्त्री र मन्त्रीहरुलाई सँगै उभिन पत्रकारले आग्रह गरे । पत्रकारको उक्त आग्रहपछि मुख्यमन्त्रीसहित तीनै जना लाइनमा उभिए ।

यद्यपी कार्यालयका एक कर्मचारीले भने फाईल बनाउनै ढिला भएकाले थोरै समय लागेको भन्दै यसलाई अन्यथा लिन नहुने प्रतिक्रिया दिए ।