जेन–जी आन्दोलनले पारेको क्षतिको प्रारम्भिक मूल्यांकन गर्दै प्रदेश प्रहरी

सुर्खेत । प्रदेश प्रहरी कार्यालय कर्णाली प्रदेशले कर्णालीका दश जिल्ला मध्ये तीन जिल्लामा जेन–जी आन्दोलनका कारण बढी क्षति भएको विवरण संकलन गरेको छ ।

आन्दोलनका कारण भदौ २३ र २४ गते विभिन्न सरकारी तथा गैह्रसरकारी कार्यालयहरुमा भएको क्षतिको प्रारम्भिक अध्ययन सम्पन्न गरेको प्रदेश प्रहरी कार्यालय सुर्खेतले जनाएको छ ।

प्रदेश प्रहरी कार्यालयका वरिष्ठ प्रहरी उपरीक्षक केदार खनालका अनुसार आन्दोलनका कारण सुर्खेत जिल्लाका २२ ओटा घर, पार्टी कार्यालय, संघीय कार्यालय, प्रदेश र पालिका कार्यालयहरु पूर्ण रुपमा ध्वस्त भएका हुन ।

यस्तै, जिल्लामा आंशिक क्षति भएका यस्ता कार्यालयहरुको संख्या पनि २२ नै रहेको छ भने सामान्य क्षति भएका कार्यालयहरुको संख्या तीन ओटा रहेको छ ।
यस्तै, जुम्ला जिल्लमा आंशिक क्षति भएका कार्यालयको संख्या ४ रहेको छ भने मुगुमा आंशिक क्षति भएका कार्यालयको संख्या दुई रहेको छ ।

यस्तै, कर्णालीका यी तीन जिल्लामा कुल ८० ओटा सवारी साधनमा क्षति पुगेको छ । सुर्खेत जिल्लामा रहेका सरकारी साधनहरु तीन पांग्रे ११ पूर्ण क्षति भएका छन भने १४ ओटा आंशिक रुपमा क्षति भएका छन् । दुई पांग्रे सवारी साधन २२ ओटा पूर्ण क्षति भएका छन् भने ७ ओटा आंशिक क्षति भएका छन् । जिल्लामा निजी दुई ओटा तीन पांग्रे र दुई पांग्रे पाँच ओटा पूर्ण रुपमा क्षति भएका छन भने एक ओटा आंशिक क्षति भएको हो ।

यस्तै, जुम्ला जिल्लामा रहेका सरकारी साधनहरु तीन पांग्रे ७ ओटा आंशिक रुपमा क्षति भएका छन् । दुई पांग्रे सवारी साधन ६ ओटा पूर्ण क्षति भएका छन् भने ५ ओटा आंशिक क्षति भएका छन् ।

यस्तै, सुर्खेतमा डा. डम्मर खड्काका दुर्य गाडी जलाइएको छ भने अन्य पाँच जनाको दुई पांग्रे पूर्ण रुपमा क्षति भएका हुन ।