बाध्यतावश माओवादीसँग एकता गर्नुपरेको होः नेता ज्वाला

सुर्खेत । नेपाली कम्युनिष्ट पार्टी (नेकपा)का नेता प्रकाश ज्वालाले नेकपा एमालेका अध्यक्ष केपी शर्मा ओलीले वास्तै नगरेकाले माओवादीसँगको एकतामा जानु परेको भन्दै दिग्दारी व्यक्त गरेका छन् । तुलसीपुरमा पत्रकारहरूसँग कुरा गर्दै नेता ज्वालाले माओवादीसँगको एकता रहर नभई बाध्यताले भएको संकेत गरे ।

उनले माओवादीसँगको एकताअघि एमालेमा फर्किन आफूले छलफल चलाए पनि एमालेबाट कुनै प्रतिक्रिया नआएको दुःखेसो पोखे । ‘एमाले फर्किन मैले एमालेका केही साथीहरूसँग छलफल पनि चलाएको हुँ,’ उनले भने, ‘तर, एमालेबाट रेस्पोन्स नै भएन ।’ केपी ओली निकै अंहकारी भएको टिप्पणी गर्दै नेता ज्वालाले ओलीले आफू सुध्रिने प्रतिवद्वता मात्रै जनाएको भए तत्कालीन नेकपा एसका धेरै नेता उतिबेलै एमालेमा फर्किन तयार भएको बताए ।

‘ओली सुध्रिने प्रतिवद्वता मात्रै खोजेका थियौँ, उनले प्रतिवद्धता पनि गरेनन्,’ उनले भने, ‘उनले सुध्रिने प्रतिवद्वता जनाएको भए धेरै नेता एमालेमा फर्किने थियौँ ।’